Yeh Highway Nahi, Railway Hai Bhai!

Duniya me log kai galtiyan karte hain. Koi ATM pin bhool jata hai, koi girlfriend ka birthday, toh koi apne relatives ko pick karna bhool jata hai.  Par Uttar Pradesh ke Amroha wale bhai ne galtiyon ke mahaan encyclopedia me ek naya chapter likh diya - Ghar jaane ka rasta hi bhul gaya!
Ye shayad U.P. ki pehli gaadi hai jo train se pehle track pe pahunchi!

Scene kuch aisa tha: Ek shandaar shaadi se ek aur bhi shandaar return journey. Shaadi ka special guest, "Drunk Driver of the Year!" 3 AM ka waqt tha, moonlight me gaadi thi full speed me, aur dimaag? Out of service.

Bhai sahab railway crossing se aaram se nikal sakte the, par dimaag ne bola—“Zindagi me kuch toofani karte hain!” Aur bas, direct railway track pe SUV utaar di. 
50 meter tak gaadi aage bhi badh gayi, par jab tyre ne bola "Bhai, ab bas, aur nahi hoga", tab driver ko realise hua ki yeh Meerut Expressway nahi, Meerut Wale Express ki patri hai!

Driver ne pehle brakes lagaye, phir dimaag lagaya, phir bas—steering chhoda aur bhag liya!

Ek taraf gaadi bechari track pe stuck thi, doosri taraf railway officials ki neend udaane ka bandobast ho chuka tha. Kyunki Delhi se ek maalgaadi full speed me aa rahi thi, aur uska sirf ek station ka fasla tha.

Railway waalon ka reaction ekdum filmy tha—pehle aankh ragadi, phir ek doosre se confirm kiya, phir socha “bhai, yeh asli gaadi hai ya kisi ki prank video shoot ho rahi hai?”

Par tension mat lo, train driver ekdum alert nikla! Samay pe brake lagaya, train 35 minute late ho gayi, par ek bada accident hone se bach gaya. Matlab, agar driver gaadi track pe dalne ke pehle thoda alert hota, toh yeh sab hota hi nahi.

Ab aayi asli dikkat—gaadi ko hatayen kaise?

Ek taraf hydraulic crane ki demand ho rahi thi, doosri taraf ek station master bola, "Bhai, hydrant se paani maar ke dheere dheere side pe kheench lo!"  Aur bas, as usual humare railway waalo ka full teamwork mode on ho gaya.

Railway waalon ne paani daal-daalkar SUV ko track se hata diya, par driver ka koi pata nahi. Aakhir me complaint likhi gayi, FIR register hui, aur ab police driver ko dhoondh rahi hai. (Pakka kisi corner me baith ke apne doston se keh raha hoga—"Bhai, uss raat toh gazab bawaal hogaya tha.")

Aap batao!

Agar aapko drunk driver ka GPS update karne ka chance mile, toh usko kya direction doge?

Share karo apne doston ke sath jo highway aur railway me farq nahi samajh paate!