Biwi Se Badla Lene Ka A1 Tarika!

Aapne kayi saari revenge stories suni hogi, dekhi hogi ya share ki hogi. Lekin, lekin yeh revenge story toh harr revenge story ka baap hai, level max!

Bhagwaan kisi dushman ki qismat mein bhi aisa plot twist wala revenge na likhe!

Badla lenewaale apne ex ka naam note par likhkar viral kar deta hai, koi harr din apne feed pe dukh bhare reels daalta hai ya toh koi social media pe apni new hot dates ke pics flex karta hai.

Lekin Bihar ke iss husband ne jo kiya, woh toh in saari cringe situations ka baap nikla.

Zara gaur se padhna, kyunki pati ne apni tragedy ka badla lene ke liye jo strategy banaayi, woh toh history ke panno mein highlight ki jaayegi.

Let’s take you through the story!

Aap toh jaante hi hai— The Big Fat Indian Wedding ka ritual, jahan dulhe ko pyaar se ladkiwaalon ke tarafse ek special gift milta hai. Humaare Bihari Babu ko shaadi mein bike mili thi. Yeh bike ladki ke naam par registered thi. Bike ghar laakar dulhe miyaan toh bahut khush huye. ‘Just Happily Married’ — ka tag apne harr pictures mein daalne lage.

Lekin khushiyon ko nazar lagne mein zyaada der nahi lagti hain. Dheere dheere inn dono ka pyaar jhagde mein badal gaya. Harr din ki nok jhok, aur rok tok ghar ko ek legit reality show bana chuki thi.

Tang aakar ladki ne pati ka ghar bye-bye kar diya aur seedha divorce ke papers courier kar diye. Jo kabhi ek doosre ko lovey-dovey love letters likhte the, unhi lovers ko jab divorce papers pe sign karna padha, ladke ne dimaag ki batti jala ke ek full-proof, fadu revenge plan ready kar diya!

Ladke ko jo bike shaadi mein mili thi woh ladki ke naam pe register thi. Uske gharwaalon ne yeh gift dete samaye yeh socha hoga ki yeh dono bike par baithkar long rides pe jaayenge, romantic outings plan karenge, ek hi glass mein do straws daalke strawberry milkshake piyenge.

But fate had its own plan!

Ladke ne uthaaya issi baat ka faayda. Harr din woh yeh bika nikaalta aur jaan-bujhkar signal todne laga. Bike ladki ke naam pe registered thi toh signal tootne par, chalan ladki ke naam ka kattne laga!

Jee haa! Last 3 mahino mein ladki ke naam— ek nahi, do nahi, 4 chalan katte hai. Sochiye, yeh toh wahi baat ho gayi—bijli koi aur enjoy kar raha hai aur bill kisi aur ka fatt raha hai!

Pehle toh ladki ne bina soche-samjhe fines bhar diye, par jaise hi usne pati ki yeh mastermind strategy decode ki, usne seedha complaint register karwa di.

Police waale bhi itni dramatic penalty story sunke shock mein aa gaye. Bhai, aisa case toh unhone bhi pehli baar dekha tha!

Social media pe jaise hi yeh case highlight hua, saare dil-toote lovers isko full speed se share karne lage. Ex-Club ka naya chairman bann chuka tha yeh banda!  Comments section support aur likes se bhar gaya. Kuch logo ke liye inspiration zaroor bana hoga!

Complaint likhne ke time ladki ko laga ki police ke fear se pati usse bike wapas kar dega. Lekin kutte ki dum aur ex ke iraade—kabhi seedhe nahi ho sakte! Maamla bilkul garam doodh ki tarah ubalne laga!

Ladka daredevil nikla, na usne bike return ki aur na chalan bhara. Usne toh saaf keh diya ki jab tak unka divorce full and final nahi ho jaata, woh bike wapas nahi karega. Do you also think this man is living his perfect revenge dream?

Ab inn sab mein ladki kare toh kya kare? Usne toh socha tha ki ghee seedhi ungli se nahi niklegi toh tedhi karke nikal legi, lekin yeh attempt bhi epic fail ho gaya.

Taarek pe taarek court se milti rahi aur unka divorce case pichle kayi mahino se chal raha hai. Ab dekhte hai aage kya hota hai!

Moral of the story—Shaadi soch samajh kar kiya karo, warna lene ke dene pad sakte hai!

Aur haan, agar aapko lagta hai ki sirf saas-bahu ke jhagde daily soap level ke hote hai, toh yeh pati-patni ka revenge saga bhi kisi masala film se kam nahi hai! Agla episode kab aayega? Koi nahi jaanta!

Lekin ek baat toh pakki hai—Bihar ki police ne aaj tak kisi pati ka aisa ‘Signal Tod Revenge’ nahi dekha hoga.