Thieves ya MasterChef? Noida ke choro ne chori ke saath cooking bhi kar li!

Agar aap soch rahe ho ki chori ek serious crime hota hai, toh bhai Noida ke choro ne toh ise ek full-fledged picnic spot bana diya hai!

Ek nahi, do nahi, pure 6-7 ghar loot liye!

Par lootne ke saath-saath khaane-pine ka bhi full intezaam kiya.

Ek taraf ghar ke owners tension me the, doosri taraf yeh chor apna paan thook rahe the, beedi pi rahe the, fridge khol rahe the aur toh aur… pakode tak fry kar diye! Matlab, ghar lootna chhodo, yeh toh ek family gathering jaisa scene lag raha tha.

Kahin aage chalkar yeh chor restaurant na khol le? Naam bhi ready hai:

“Chor ke pakode”

Aapne kaafi dedicated employees dekhe honge, jo office me overtime karte hain.

Noida ke yeh chor bhi full dedication se kaam kar rahe the, par office ke laptop pe nahi, dusro ke lockers pe!

Chalo, ek baar samajh aata ki sirf paise aur jewelry le gaye, par bhai paan kyu thooka? Matlab, chori ka bhi ek decorum hota hai, yeh log toh bathroom me bhi mess chhod ke gaye!

Ek ghar me toh bechare owner Madhya Pradesh gaye the, tab tak in choro ne 40 lakh ka maal udaa diya!

Ek aur case me 3 lakh ki jewelry ghum ho gayi.

Par asli sawaal yeh hai ki beedi pi ke paan thook ke unko chori me kya extra motivation milta hai?

Agar yeh chor kisi corporate job me hote, toh unki performance report kuch aisi hoti:

Strengths:

Overtime karna aata hai

Stress management strong hai (loot ke baad bhi chill kar rahe the)

Cooking skills bhi mast hai

Weaknesses:

Bathroom cleanliness zero hai

Beedi aur paan addiction

Teamwork thoda zyada strong ho gaya

Ek baat toh confirm hai, inki job security strong hoti aur achi salary bhi kyunki kya pata agla number boss ka lag jaata.

Ab jab yeh case viral ho gaya, toh police bhi serious ho gayi.

DCP sahab ne pura team bana diya hai, aur kaha hai ki “jaise bhi ho, inko dhoond ke lana hai.”

Matlab, ab in choro ko paise se zyada apni pakode ki recipe chupani padegi!

Public Reaction: Koi Inse House Party Plan Karna Chahta Hai!

Internet pe logon ka reaction bhi full solid aa raha hai.

Ek user ne likha: “Bhai yeh toh thieves nahi, lifestyle influencers hai!”

Dusre ne kaha: “Inke pakode taste karne ka mann ho raha hai, koi review de sakta hai?”

Ek aur ne toh seedha suggestion de diya: “Bhai log, agla step restaurant chain kholna hai!”

Matlab, chor bhi khush, public bhi entertained, bas police kaafi naraz hai, aur jinke ghar chori hui wo bhi!