Shinchan Didi Ne Todey Rohtak Mein Traffic Rules

Hum mein se kon Shinchan ko nahi jaanta? “Sabko hasa dega Shinchan” ye toh sab jaante hi hai. Lekin iss kahaani mein Sabko Hairaan Bhi Kar Dega Shinchan!

Kuch logo ke liye vo bachpan ka ek yaadgaar cartoon tha, but kuch doosre kism ke log, jo apne bachpane ko chhod nahi paaye, aaj bhi Shinchan ko apna idol maante hai.

Ek aisi hi ladki, jo ki shinchan ki kaafi badi fan hai, traffic rules todti hui ek safar par nikli, Rohtak mein. Bina helmet, bina number plate aur bina kisi direction ki sense ke, didi befikar chalti rahi.

Behti hawa si thi voh, kaha gayi unhein dhundho.

Humaari traffic police ne unhe kaayde se roka, aur maafi maangne ke vajaaye didi ne kya kiya? Vo Shinchan ke character mein chali gayi! Commitment dekh rahe ho?

Jab traffic police ne poochha ki voh kon hai tab unhone shuddh hindi mein bataaya ki vo none-other-than swayam Shinchan Nohara hai, aur kehne lagi "Main hun Shinchan Nohara. Mujhe koi kahi nahi le jaa sakta.” Haan, Rohtak se hi toh hai na Shinchan Nohara. Aur toh aur, unhone ye bola bhi bilkul Shinchan ki awaaz mein!

Badi mushkil mein padi ye Rohtak ki Shinchan Nohara.

Chalaan ki warning milne ke bawajood bhi, Shinchan Didi ne character nahi chhoda. Method actor lagti hai didi. Commitment ki daat deni padegi! Agar hum jaisi aam janta mein itni dedication hoti toh aaj Mars pe humaara ek chhota sa ghar hota.

Traffic police waalon ne jab unhe bola ki aap apni mata ji se apni identity verify karaayein, toh vo kehne lagi ki unki mummy toh Shreemati Nohara Ji hi hai. Jab mummy japan mein hai toh yaha ID kaise verify hogi? Bol toh aise rahi hai jaise inn didi ka Aadhar Card bhi japanese hi hai.

Traffic police officer ne Shinchan Didi ko video mein ye bhi samjhaya ki agar aise hi chalati rahi tohwe Yamraj aake unhe le jaayenge. Shinchan didi ka reply? “Yamraj aapke papa hai kya, Traffic Police waale uncle?”

Shinchan didi rocked, traffic police waale shocked!

Dilchaspi ki baat toh yeh hai ki iss mazedaar silsile ka ant hua bina kisi chalaan ke. Shinchan didi ko mili bas ek warning, aur vo traffic police ko Sayonara bolke chal di apne rastey.

Aur log kehte hai ki cartoons se koi influence nahi hota. Mein aapko bataana chaahunga ki Traffic policeman aur digital creator Amar Katariya ki iss shinchan waali video ko 11 million se zyaada views mil chuke hai.

Kayi logon ne Shinchan didi ki oomda performance ko khoob saraaha hai, aur kayi internet-waasiyon ne isey ek social media stunt bhi thhehraaya hai. Arey ye kaisa stunt hota hai? Can’t believe we got Khatron Ke Khiladi ka Shinchan version before GTA 6.

Aur jo log keh rahe hai ki ye reel accha example set nahi karti…Shinchan show bhi koi bohot accha example set nahi karta tha bachhon ke liye.

Iss mazedaar kisse ne humein kaafi kuchh sikhaaya:

Lesson #1 - Shinchan ka dabdaba abhi bhi kaayam hai, umar ya generation jo bhi ho.

Lesson #2 - Chalaan ho ya boss ke saath meeting. Situation se baahar nikalne ka ye tareeka kaafi hatke hai. Ek try toh banta hai.

Lesson #3 - When life gives you chalaan, go into Shinchan mode.

Lesson #4 - Life chaahe jaisi bhi chal rahi ho, hasi mazaak nahi rukna chahiye.

Lesson #5 - Shinchan didi ke aage koi kuch bol sakta hai kyaa…

Lesson #6 (Sabse important) - Don’t be like Shinchan didi…road safety rules bohot important hai aur aapke bhaley ke liye hai. Baaki saare lessons bhul jaaiye aur ye yaad zaroor rakhiye. Hasi mazaak ki ek apni jagah hoti hai, sadak vo jagah bilkul nahi hai.

Apne doston mein sabse bade shinchan fan ke saath ye share karo, aur sadakon pe savdhaan raho!