Phata poster nikla chor!

Kehte hai, pyaar karne waale apne pyaar ke liye kuch bhi kar sakte hain. Aur iss baat ka jeeta-jaagta example hai yeh Manju, jisne apni girlfriend ko 3 crore ka bungalow gift kar diya! Haan, sahi padha aapne—teen crore ka bungalow!

Pata bhi hai 3 crore mein kitne zeros hote hain?

Ab sawaal yeh uthta hai ki bhai yeh 3 crore aaye kaha se? Paisa ped pe toh ugte nahi ya phir shayad iske paas koi alag sa money plant hai!

Well, iss love story mein twist, drama, suspense, aur crime sab hai! Full-on paisa wasool hit movie ki tarah!

Majnu bhai ne apni cutie ko jo gift diya tha pookie banne ke liye, woh chori ke paison se kharida gaya tha!

Jab police ne Solapur ke iss romeo ko interrogate kiya, tab unhe iske con skills ke baareme pata chala. Bhai sahab par 150+ robbery cases already registered hain.

Kehte hai, deewaron ke bhi kaan hote hain, unhi deewaron ne ek aur solid khabar hume di—lover boi ne isse pehle bhi apni favourite heroine ko Rs. 22 lakh ka aquarium gift diya tha!

Kya aap bhi humaari tarah iss aquarium ke fishes se jealous feel kar rahe ho?

Aur lo, sirf bungalow aur aquarium tak baat khatam nahi hoti. Jo bhi jewellery churaata tha, usko gold biscuits mein convert kar deta tha! Recently, iss chor ne approx 410 gm ke gold aur silver ornaments ek locked house se churaye the.

Sunne mein aaya hai ki iss romeo ki biwi bhi isse pareshan thi aur usne isko ‘womanizer’ ka tag de diya tha!

Aur suno, yeh banda sirf 25 saal ka tha jab yeh apni pasandida actress se milne ke liye 15 lakh uda chuka tha! Matlab 25 ki bali umar mein isne apna investment shuru kar diya tha!

Iski chori ki kahaani ek laptop churane se start hui thi (apne office ka laptop churaane ka socho mat! ) Phir inka ‘resume’ update hota raha with bigger projects. We’re sure bahut jald iski crime story par biopic banegi (any suggestion which actor should play his role?).

Kisi ne sahi kaha hai—mard apni pasandida aurat ke liye kuch bhi kar sakta hai. Koi shayari likhta hai, koi guitar bajana seekhta hai, toh koi chori karta hai.

Pyaar mein log chaand taare todne ki baat karte hai, but iss bande ne toh apna ek alag hi record set kar liya.

Aaj tak suna tha ki pyaar andha hota hai, par yeh toh criminal mastermind bhi nikla!

Moral of the story? Pyaar mein dil churao, kisi aur ka ghar nahi.

Aur haan, jo bhi soch rahe ho ki bhai ko pakad liya gaya toh kya hua, ladki ka dil jeetna koi bhai se seekhe! Toh yeh thought ko fatse Shift+Delete kardo. Agar tumhari bandi tumse true love karti hai toh you can win her with small gestures like preparing her a garam chai or taking her out on a pani puri date.