Recipe For ‘Disaster’ Ya ‘Disaster Recipe’? Dono Hi!

Internet ki duniya ek badi hi mazedaar duniya hai aur Social Media hai usme ek atrangi city. Unhoni ko honi mein convert karna, apni marzi ke maalik banna aur back-to-back aise stunts karna jo aapko ek criminal ke category mein easily daal sakti hai—inn cheezon ko, iss duniya mein, ‘trends’ ka stylish naam diya jaata hai. Aur inn trends se honewali kamai ko bulate hai ‘viral’ yaane ki ‘famous’ hona!

Internet se ek taaza-karari, seedha tandoor-se-bahar type ki khabar aayi hai. Iss khabar se recover hone ke liye readers ko 15-17 business days lagege aur kuch logon ko toh therapy sessions bhi schedule karne padege. Isiliye, iss khabar ko bina adult supervision ke naa padhe.

Imagine karo ki aapki 2 favourite cheezon ko milake ek combination banaya hai. Favourites ka double dhamaal hoga yaa atrangi combinations ke world record mein double trouble ka addition hoga? (Jinhone bhi first option choose kiya hai, MCQ test mein zaroor sirf passing marks se pass hote honge.)

Pesh hai… INSTANT NOODLES CHAI!

Yeh ek aisa forced relationship hai jisme naa toh chai-lovers khush rahenge aur naa hi instant noodles ke fans. Break up toh durr ki baat hai, iss combination ko imagine karna bhi paap hai, paap!

Video start hota ek garma-garam chai ke sath. Ek traditional kulhad mein chai daali jaa rahi hai. Dekhte hi mann khush ho jayega. Pahadon ki yaad satayengi yaa baarish wali shaamo ki yaad aayegi. Dusri taraf, instant noodles banaye jaa rahe hai. Dekhkar hi aapko lagega, “Arre waah waah! Aaj toh mazza hi aa jayega.” Lekin “spoke too soon” ke shikaar naa bane, toofaan toh abhi aane wala hai.

Video jaise hi aage badhta hai, tab pata chalta hai ki yeh instant noodles ko chai ki kulhad mein daala jaa raha hai. Bura-bura bolne ka mann kar raha hai, hai na? Aaj raatko neend nahi aayegi, ek hafte tak hasi nai aayegi aur chai aur instant noodles ko kabhi bhi pyaar se nahi dekh paoge. Daya se dekhoge, daya se.

Iss combination ko dekhkar abhi ke abhi ek hunger strike par jaane ka zor se mann karega. “Justice for chai” aur “Justice for instant noodles” yeh naare neend mein bhi lagaoge.

Khoon-paseena ek karke content create karne wale Content Creators ko yeh jaante huye bahut hi bura lagega ki iss sad, depressing video ko mile pure 2.5 million views! Isse toh naa ring light use karni padi, naa 10 baar makeup karna pada aur naa hi kisi trending reel par dance karne ki practice karni padi. Unfair hai? Bahut hai!

Share karo apne unn friends ke sath jo aise food combinations ko badhava dete hai aur unhe bolo ki chai aur instant noodles ne unhe ban kar diya hai, forever!