Kutta Bana Sher, Chala Jeep Ki Sawaari Par

Mufasa ko kon nahi jaanta? Lion King toh har jagah famous hai. Lekin ye kahaani unki nahi haai. Ye kahaani hai Mufasa ke door ke rishtedaar Mastiff, the ‘Desi Lion King’ ki.

Social media ki nagri mein aaj ubhar ke aayi ek dara dene waali khabar. Vishakhaptnami ki galiyon mein dikha ek sher!
Magar bas itna hi nahi, uss sher ko aas paas ke logon ne kais karne ke vajaaye laad aur pyaar diya. Magar aisa kyu? Kyuki sutron ke anusaar vo asli sher tha hi nahi! English Mastiff biradari ka ek kutta tha!

Mufasa sher toh Mastiff sava sher!

Ji haan, ek English Mastiff jeep ke bonnet pe sher banke gedi pe nikla hua tha. Log kehte hai har kutte ka din aata hai, aur is kutte ka din ye tha.

Social media pe daali gayi iss video ko ab tak 18 million se zaada views mil chuke hai, aur yahaan humein samajh nahi aa raha ki log velle hai ya iss video se bohot prasann. Aap video mein dekh sakte hai ki vo English Mastiff gharaane ka kutta, oh sorry, sher, jeep ke aage ke hisse mein khada hai aur uske ghar waalon ne uski leash pakdi hui hai. Bohot hi khaufnaak drishya. Lekin aashcharya ki baat ye hai ki kisine police ko bulaaya nahi. Aas paas se guzarte hue bikers aur pedestrians bhi ye sab dekh ke dang reh gaye, lekin khauf ne unhe jakad liya aur sher ke khilaaf kuch karne na diya.

Aise koi sher khule mein chhodh diya jaaye toh khabar toh failegi hi. Iss khaufnaak jaanwar ki sun ke aas paas ke log kaafi chakit ho gaye, magar apne ghar ki kundi darwaazein band karne ki jagah vo iss sher ki photo lene pohoch gaye. Kaafi fearless bheed ikkathi ho gayi sher ke paas. Sher ne bhi janta ki suni posing mein koi kasar nahi chhodhi kyuki…he is a very good boy. Jungle ke shehenshah aise hi thodi na bante hai? Ye Sher Bohot Daler Hai, Samjhe Na?  #LionOnTop

Ye stunt dekh ke internet ke logon ne kaafi alag alag dhang mein react kiya. Kuch bohot khush hue aur hasey, aur kayi logon ne iss stunt ki prataadna ki aur ek safety risk samjha. Sher khul-e-aam ghume toh safety risk toh hota hi hai na boss!

Kisssa dilchasp toh hai, lekin aise gaadi ke upar ek kutte ko make up lagake latkaye rakhna koi acchi baat nahi. Iss sher ke owners ko social media pe attention toh mil gayi, par apne pyaare pet ko, aur saath hi aas paas ke logon ko jokhim mein daal kar. This trip was a bad trip, urf, BT.

Sab ko ek chetaavani: please do not try this at home! Aisey karnaame dekhne mein acche lagte hai, karne mein nahi. Aur khuda na khaasta agar kabhi ek sher dikh jaaye sadak pe toh uski photo lene mat aana, dusri taraf bhaagna. Nahi toh khud photo ban jaoge. 

Baaki toh aapke ghar ka kutta bhi sher se koi kam thodi na hai!