Dil Toh Koi Bhi Chura Leta Hai, Bridge Churake Dikhao!

Aflatoon, ghazab choriyon ka mention news headlines mein aana koi unusual baat nahi hai. Insaan ka dimaag chakra jaata hai aur woh koi tedha sa jugaad karke chori karta hai. Lekin, yeh toh maanna padega ki jab bhi koi innovative chori news mein headlines banati hai, hasi ka jhatka toh milta hi hai.

Ek aisi hi dimaag ko hilake rakh dene wali chori hui Bihar ke Amiyavar gaav mein. Jewellery chori hui? Nahi. Paise chori huye? Nahi. Kapde, joote, chappal, khana, kutta? Nahi, nahi aur nahi! Ek pura ka pura bridge chori hua hai. Ji haa!

Kya, kaise, kab aur kyun? Chalo, jaante hai.

Amiyavar ke gaav-vaasiyon ke dil mein ummeed ki kiran chamki jab ek subah unhone dekha ki unke gaav ke nikamme bridge ko nikalne kuch log aa chuke hai. Der se hi sahi, par unki maange suni zaroor gayi. (Uss din gaav mein zaroor litti-chokha party huyi hogi.)

3 din, inn aadmiyon ki fauj roz subah 7 baje bridge ko harane aa jaati thi. Khoon, paseena aur apne chori ke intentions ek karke yeh iss bridge ko dheere-dheere todte, ussi tarah jis tarah life ke reality checks hamare masoom dil ki khushiyon ko todte hai. Shahi Tukda ka toh pata nahi par har shaam, ek van aake “Bridge Tukda” ek warehouse mein lekar jaati thi.

Gaav walon ko jo kaam “nek” lag raha tha woh actually “snake” nikla! Amiyavar ke local journalist, Jitendra Singh, ne kaha ki gaav mein kisiko pata nahi tha ki yeh ek loot hai. In fact, Jitendra Singh toh iss bridge se sirf 200 meters durr rehte hai, unhe bhi nahi samjha. Bagal mein chhora? Nahi! Bagal mein chor, bina kisi dhindora!

Din-dahade ek 60ft lamba aur 12ft high bridge chura liya, inn logo ko toh kisi ka khauf nahi. Yeh bridge 1976 mein banaya gaya tha. 2000s mein gaav walon ne isko ghost kar diya tha kyunki ek dusra good-looking (concrete) bridge ban gaya tha. Iss bridge ne socha naa hoga ki iska farewell itna dramatic aur viral hoga.

Ab tak, iss mahaan stunt ke actors, directors, producers aur spot boys mein se 8 logon ko police ne kar liya hai arrest.

Par pata kaise laga ki yeh neki ka kaam nahi, chori ka kaam tha?

Toh hua yeh ki Amiyavar ke BFF gaav mein rehne wale Pawan Kumar ko gali-gali ke shor se pata chala ki bridge nikal diya hai. Unhone kiya Irrigation Department mein apne dost ko phone aur kiya ek full-blown matter. Unke dost ne kaha ki yeh matter toh out of syllabus hai kyunki bridge ko nikalne ki koi baat hi nahi hui hai. Aur tab hua inn nek chor parindo ka parda fhash!

Gaur se nahi bhi dekha jaaye, toh bhi yeh kehna galat nahi hoga ki ek bridge ko churana ek mastermind move hai.

Share karo apne unn doston se sath jo bridges burn mein expert hai.