Mahakumbh Ka Jaadu: Bhandara Khaate Dikha Hari Puttar

From the UK to UP! Hari Puttar pohoche Mahakumbh mein. Swaadisht Bhandara enjoy kiya, aur ho gaye viral!

Mahakumbh Mela ek bohot hi dilchasp mela hai. Mahakumbh 2025 roz koi na koi viral news leke aa raha hai. Anokhe babaon se leke hatke dikhne waale logon tak, Mahakumbh ek viral content ka mela ban chuka hai. Jabse shuru hua, kaafi anokhi kahaaniyaan hum sabke saamne aa chuki hai. Ye bhi ek aisi hi kahaani hai.

Ye toh sab jaante hai ki Mahakumbh ek bohot hi jaadui jagah hai jaha duniya bhar se log aate hai. Lekin ye koi nahi bol sakta tha ki yahan duniya ke sabse mashoor wizard urf jaadugar bhi upasthith honge!

Kon? Arey wahi, Hari Puttar! Jinehin hum bachpan se apni screen pe dekhte aa rahe hai!

Unka jaadu career unhe le aaya Mahakumbh, jaha vo jaadu-tona karne bke vajaaye bhandaara khaate huye dikhey! Pehle pet pooja, fir jaadu dooja. Hai ki nahi? 

Sutron ke anusaar, Hari Puttar Mahakumbh flight se nahi, jhaadoo se aaye. Kon hai ye sutr, kaha se aate hai? Lagta hai humein naye sutron ki zaroorat hai.

Inke ek bhandaar visit ne poore mele mein bhaukaal macha diya! Bhaukaal se yaad aaya,Hari bhai, ek chakkar Kumbh ke Bingo! Tedhe Medhe ke Bhaukaal Lok ka bhi laga lete. Hari Puttar ka #UPWalaJalwa dikh jaata toh bawaal hi mach jaata! 

Iss viral video mein Hari Puttar ji ke haath mein ek pattal hai jise vo Bhandaara kha rahe hai. Maze ki baat? Vo kaante chamach ke saath nahi, apne haathon se kha rahe hai. Waah! Humaare reeti rivaaz ki qadar karne ke liye shukriya. We are proud of you, puttar!

Iss viral video pe internet-waasiyon ne apni tippani bhi di.
“Hari Puttar prasad enjoy karte hue” bole ek internet waasi. “Bhai hari puttar jaisa dikh raha hai” bole dusre internet waasi. 

“Hari Puttar ne khaana nahi barbaad kiya Bharat mein khaan porre karna ka aadar karna inko bhi aata hai humein garv hona chahiye” boley teesre internet waasi! Kya baat kahi hai bhai. Hari Puttar = Indian confirmed!

Dekho shakal toh milti hai..ye baat toh maanni padegi. Lekin ek chashma aur maathe pe ek cut missing hai. Ye dono cheeze hoti toh saabit ho jaate ki ye vahi, UK waaley Hari Puttar hai. But bhai ki journey toh dekho: started from the bottom and now he has successfully reached Mahakumbh! Kya journey hai Hari bhai! 

Iss video ka jaadu aisa chala ki iss par takreeban 4 lakh likes aur 4000 comments aa chuke hai! Zaahir se baat hai, internet waasiyon ko ye video bohot pasand aayi!

Ye video sochne pe majboor toh karta hai. Agar Mahakumbh mein itni hastiyaan dikhti hai toh movie dekhne kyu jaana? Mahakumbh aa kar pooja paath karlo, swaadisht bhandara kha lo aur hastiyon ke 2-4 autograph bhi mil jaayenge!

Mahakumbh ki maya dekho, kon kaha kaisa pohoch jaaye kya maloom. Sab likha hua hai! Hai ki nahi? Aapke kya khayaal hai? Kya lagta hai, aur konse celebrities dikhenge Mahakumbh Mela mein?