Ajab text ki gajab kahaani

Sochiye zara, aapne kisiko saalon pehle text kiya ho. Woh message bhejne ke baad zindagi aage badh gayi, aap aage badh gaye par ek din achanak uss text ka reply aa jaata hai!

Kya hoga aapka reaction? Dimaag ghoom jaayega na? Pehle toh shock lagega, phir curiosity? Phir over-thinking!

Waise toh harr koi apne ex ke reply ka intezaar karta hai, par agar message kisi aise insaan se mile jisse kabhi expect bhi na kiya ho toh khushi se zyaada jhatka lagta hai. Aisa hi kuch hua hai Bangalore ke ek techie ke saath. Neil Agarwal ko ek din ek text ka reply aaya jo usse 2018 mein bheja tha and yeh message uske ex se nahi, uske professor se aaya hai.

Chalo thoda flashback dete hai—Kahani shuru hui April 2018 mein, jab Neil apne engineering college mein padh raha tha. Neil par assignment submission ka pressure tha isliye usne apne Maths ke professor ko ek text bheja.:
 “Ma’am, this is Neil from A1, FE. Will you be accepting the Maths files today?”
 Ma’am ne sirf itna reply kiya, “Signing only.”

Neil ne socha, kaam toh pura karna hi hai. Toh thodi der baad usne ek aur message bheja:
 “Ma’am, have you come to college today? We want to submit our files.”
 Iss baar koi reply nahi aaya. Yeh unn dino ki baad thi jab koi reply na kare toh chal jaata tha. Ab agar aisa kuch hua toh student professor ko message kar karke pareshaan kardete.

Fast-forward to 2024 — Neil ne kabhi socha bhi nahi tha ki ek random din usse apni purani professor ka message aayega.

 “Neel, are you in college today?”
 2021 mein graduate ho chuka Neil jo abhi adulting ke trauma mein jee raha hai, usse yeh message dekhkar shock laga aur usne turant reply kiya: “What is this regarding? I passed out in 2021.” Aur phir aaya professor madam ka iconic reply: “Ok, I thought you are in 8th sem.”

Neil ne zaroor socha hoga, ya toh time freeze ho gaya hai ya fir uski attendance itni kam thi ki logon ko abhi bhi lagta hai woh engineering khatam hi nahi kar paya. Maths ka khauf kise nahi hota aur jab uss subject ka professor aapko aise reply kare toh dil senty ho jaata hai.Iss unexpected convo ne uski boring 2024 ki shaam ko ek zabardast throwback moment bana diya.

Jab Neil ne iss screenshot ka picture social media par daala, social media world ne isspar crazy react kiya! Within hours, yeh screenshot viral ho gaya—meme pages mein sablog iss par reply and react karne lage. Aap toh jaante hi meme ki duniya mein koi bhi raato raat star bann sakta.

Social media pe jab koi cheez relatable aur funny hoti hai, toh usse viral hone se koi nahi rok sakta. Neil ka ek chhota sa confusion ban gaya internet ka favourite inside joke! Neil ne toh social media par yeh bhi likha hai ki — “They think I’m a failure.”

Sochne ki baad yeh hai ki kya yeh koi galatfehmi hai ya sachme professor ko lag raha tha ki Neil 8th sem mein abhi tak struggle kar raha hai.

Neil ke liye yeh ek unexpected blast from the past tha, lekin social media ke liye yeh ek meme goldmine bann gaya.

College life ki yaadein, professors ki daant, aur woh eternal engineering struggle—sab kuch ek hi screenshot mein capture ho gaya. Kisi users ne Neil ko yeh bhi reply kiya hai—”Once a student, always a student.”

Isse yeh bhi samajh aata hai ki kuch unexpected replies aapka din banna sakte hai. Isliye abhi unn pending messages ko reply kardo taaki aap kisi ke chehre par smile laa paaye aur kya pata aapke message ka screenshot viral ho jaaye!