DATING APPS pe swipe karna aajkal utna hi normal hai jitna weekends pe Netflix binge karna. Lekin har zodiac ka apni unique dating-app style hota hai. Chalo dekhte hain, aapka star sign aapki online dating personality ke baare mein kya kehta hai.

♈ Aries: “Swipe pehle, sochna baad mein”

Aries walo mein patience naam ki cheez hi nahi hai. Profile dekha, dil ko laga theek, toh right swipe instantly. Bio padhna ya background check karna unke liye secondary hai. Baad mein agar vibe match na bhi kare, toh bhi koi regret nahi, kyunki Aries hamesha next adventure ke liye ready rehte hain.

♉ Taurus: “Food is my love language” 

Taurus ki dating journey khane-peene ke aas paas ghoomti hai. Pehla hi question hota hai: “Pani puri pasand hai ya sushi?” Agar tumne unke taste buds se match kar liya, toh woh tumhe apna comfort zone samajhne lagenge. Lekin agar food chemistry nahi bani, toh jaise barfi mein cheeni ki jagah namak dal gaya ho. Bilkul out of place aur inedible.

♊ Gemini: “Baatcheet toh sabse hona chahiye”

Geminis ke liye dating app ek giant playground hai. Ek hi time pe multiple chats, witty comebacks aur nonstop bakbak – unka charm alag hi level ka hota hai. Lekin unki problem yeh hai ki focus kabhi ek jagah tikta nahi. Aaj tum unke favourite ho, kal koi naya match spotlight le lega. They personify the outlook of “Aaj Pooja toh kal koi dooja”.

♋ Cancer: “Hi… yeh lo mera trauma dump”

Cancerians ek “Hi” ke reply mein apni poori life story bata dete hain. 5 texts ke andar childhood memories, heartbreak aur family pet ka intro mil jaata hai.Yeh emotions se bhare hote hain, aur dating apps par bhi apne dil ka darwaza khole baithe hote hain. Itna info milea ki match hone ke 4 din baad aap unke family tree par ‘spot the relative’ khel sakte hain. Kabhi-kabhi yeh over-sharing unhe vulnerable bana deta hai, lekin woh sirf genuine connection ki talash mein hote hain.

♌ Leo: “My profile = blockbuster trailer”

Leos ke dating profiles mein full-on production value dekhne ko milta hai. Perfect lighting wali selfies, carefully written bios, microphone quality wale voice prompts aur saath hi saath thoda attitude. Chat mein bhi woh spotlight chahte hain, compliments unki oxygen hote hain. Agar tumne unki tareef kar di, toh woh tumhe apna VIP treatment dene ke liye ready hain. Agar tum ek Leo ke saath unke trailer wale profile ko dekh kar swipe kar gaye, toh picture…abhi baaki hai mere dost.

♍ Virgo: “Aap match nahi, ek checklist hain” 

Virgos har cheez ko detail se analyse karte hain – height, hobbies, yahaan tak ki grammatical mistakes! Unke liye dating app ek filtering system hai jahan tumhe unke invisible checklist pe tick lagane hote hain. Lekin agar tum unke high standards ko cross kar gaye, toh woh sabse loyal aur dependable partners ban jaate hain. Aur yeh checklist bohot jald winning lottery ticket bann sakta hai.

♎ Libra: “Bachna ae haseeno, lo main aa gaya!”

Libra ek born flirt hote hain. Unki chats mein complimentski kami nahi hoti – “Tum itne funny ho!” “Tumhari smile best hai!” – lekin woh hamesha balance maintain karte hain. Matlab agar tumhe praise milega toh woh apne liye bhi thoda spotlight maangenge. Har conversation ek cute rom-com ke banter jaisa lagta hai. Pyaar do, pyaar lo. Or rather compliment lo, attention do.

♏ Scorpio: “Iss raaz ko raaz hi rehne do”

Scorpio profiles hamesha thodi mysterious hoti hain – 2 photos, vague bio aur baaki saari details ghayab. Lekin chat mein woh full intensity le aate hain: passionate, deep aur kabhi-kabhi thode possessive bhi. Tumhe lagta hai tum unhe samajh gaye ho, par unke andar hamesha ek hidden layer hoti hai jo curiosity banaye rakhti hai. Curosity ka raasta mystery ke through hi jaata hai.

♐ Sagittarius: “Dil ki dhadkan tez kar denge…adrenaline rush se”  

Sagittarius ke liye dating app ek travel agency jaisa hai – woh hamesha aise partner ki talash mein hote hain jo unke spontaneous road trips, late-night adventures aur thrill-seeking vibes ke saath chal sake. Agar tum adventure-shy ho, toh woh shayad agla match swipe kar denge.

♑ Capricorn: “Time aur pyaar dono bohot keemti hai”

Capricorns dating apps pe bhi apna practical side lekar aate hain. Unki chats structured hoti hain – “Tum kahan kaam karte ho?” “5 saal baad apne aapko kahan dekhte ho?” Agar tumhara ambition unke saath align karta hai, toh tumhe unki serious attention milegi. Unke liye time = investment.

♒ Aquarius: “Normal is boring, talk weird to me”

Aquarius log zara hatke hote hain. Unki bios mein random memes, social causes ya “pineapple on pizza – yes or no?” type quirky sawaal hote hain. Chat mein bhi woh deep ya unusual topics le aate hain – aliens, parallel universes ya future tech. Agar tum weirdness ko embrace karte ho, toh tum unke perfect match ho.

♓ Pisces: “Kya yahi pyaar hai?” 

Pisces wale full-on dreamy aur romantic hote hain. Ek simple conversation ko bhi woh emotional aur poetic bana dete hain. Unke messages mein emojis, song lyrics aur thoda filmy drama hamesha rehta hai. Agar tum unke saath chat karte ho, toh tumhe lagega jaise tum kisi slow-motion Bollywood love story mein ghus gaye ho.